模影模蹤:秋山莉奈股惑俏佳人

近日股市下滑,小弟真係一額汗,因為早前躍躍欲試,想喺股壇大展拳腳,諗起嚟真係慶幸自己掛住左諗右諗冇落盤咋。相信大家同小弟一樣冇眼睇家陣個股市,不如睇第二種股醒醒神啦。邊種股呀?有「日本美尻女王」之稱嘅秋山莉奈,就一定夠晒股「惑」喇。

靚股之達人

日本水着界當中,擁有令男人一望就硬晒軚嘅巨乳女優多不勝數,當中擁有36G震撼巨乳又靚女嘅杉原杏璃,相信係唔少男人嘅夢中女神,小弟我亦係其中一名粉絲。鍾意欣賞呢位波后嘅同時,水着界仲有另外選擇,就係股后喇。咁邊個能夠堪稱股后呢?一定係秋山莉奈。今年27歲嘅莉奈出道都有相當日子,早期拍水着寫真,以整潔又俏麗嘅面孔、纖巧又白滑嘅胴體,以及不成比例嘅臀部而成名,點樣不成比例呢?身高5呎5吋嘅莉奈雙腿修長,胸圍33B,腰肢得22吋,睇落頗為高挑,但係佢個躉居然有35吋咁大,所以甚為突出。而莉奈個股大得嚟圓潤堅挺,又滑又有光澤,美觀度爆晒燈,故有美尻女王以及御尻莉奈之稱。

專業資格多

莉奈自己曾經話過上天係公平嘅,個股生得咁出眾咁有吸引力,換來嘅後果就係胸部生得太細。不過,胸細都冇所謂啦,阿妹憑住呢個美尻成功誘惑男人而成名,事業發展可謂相當順利,而為人熟悉就係演出特撮片《幪面超人亞極陀》嘅女主角喇。之後,阿妹同特撮片相當有淵源,先後參演《轟轟戰隊》、《幪面超人電王》、《幪面超人DECADE》,亦因為咁,令佢成功「入屋」,大大增加觀眾對佢嘅接受程度。2008年,莉奈仲做埋《特命系長只野仁 最後之劇場版》嘅女主角。近年,莉奈就鮮有演出電影同特撮片,轉而主攻舞台劇,近日佢就為《落下女孩》而忙碌喇。除咗忙於演出,阿妹仲忙於讀書,呢幾年佢就取得唔少專業資格,包括愛犬飼養管理人、蔬菜酒吧招待員、農場管理員以及食品衞生檢查員資格,真係厲害!

個人博客

秋山莉奈為舞台劇演出亦不忙性感登場,佢仲成日將性感自拍照上載到博客,不妨Click上去睇睇。

網址:http://akiyamarina.cocolog-nifty.com/blog/

秋山莉奈Profile

年齡:27歲

身高:5呎5吋

三圍:33B-22-35

撰文:賢