曾幾何時，小弟相當癡情，為咗一個心儀女仔，甘心夜麻麻出街排隊，為嘅正係幫佢買絕版手袋。不過，家陣諗落都唔算為愛人付出好多，因為好多人肯付出成副身家，甚至一生為愛人做奴隸，好似法國經典情色片《O孃》入面嘅女主角O咁。
《O》片於1975年上映，戲內將愛情嘅盲目表達得淋漓盡致，令好多自問癡情嘅人士睇見亦感汗顏。故事講述本為女攝影師嘅貌美女子O，一直深愛其男友歷尼。但係呢個歷尼真係賤男中嘅賤男，因為佢覺得O嘅美色唔單只畀自己享用，最好就益埋街坊，所以就將O送到一個淫亂古堡當中，由入面嘅人將O培訓成為性奴，仲每日同佢玩SM。飽受屈辱嘅O惟恐會失去愛人，於是一直默默承受。一次又一次無感情嘅性愛同SM過程，以及罪咎感當中，O又漸漸感受到快感存在。
後來，歷尼因為欠債，遂將O賣畀好友史提芬爵士。二人從享受SM到發生真感情，最後終於結為夫婦。七十年代情色電影發展蓬勃，《O》片可以成功突圍而出，因為當時鮮有作品赤裸裸咁展露SM場面，加上故事中O被安排同其他陌生男人，一個接一個咁交歡嘅情節，極之挑戰道德觀念，令《O》片更顯破格同爭議性。個人認為女主角Corinne Clery一派楚楚可憐，加上身材火辣，亦係成功嘅原因之一。
撰文：賢