位於大三巴街和草堆街交界，有間黃色小屋，外表一啲都唔顯眼，但原來係間超過100年歷史嘅古廟——女媧廟。女媧廟除咗歷史悠久之外，原來仲同澳門嘅性工作者有着密切關係，據資料記載，在清朝道光二十九年，新一任澳督亞馬留上任，發現庫房斗零都冇，於是推出新稅制，就係「花捐稅」，亦即係將娼妓合法化，一時間澳門變得群鶯亂舞，非常熱鬧，由於娼妓攞正牌做生意，加上搵到錢，所以喺街上行走，昂首闊步，十分威風。不過，呢班妓女雖然有財富，但卻感情空虛，於是佢哋合資建女媧廟，事關女媧開天闢地後造男造女，仲教佢哋結合，自此男女成雙成對，所以女媧亦係紅娘嘅化身，於是囡囡就夾錢建廟，香火不知幾鼎盛。由於人流多，吸引唔少布疋行喺附近開檔，令成條街相當興旺。點知喺1914年嘅冬天，其中一間布疋行發生火災，最後波及埋女媧廟，主殿被焚毀，只餘現時嘅偏殿部分，但仍不阻善信參拜，一直香火鼎盛。