常言道食色性也，食同色都係人嘅本能，若然將兩者合而為一嘅話，更係令人食指大動兼食欲大增。不過講到最能糅合兩者要素嘅餐廳，則要數呢三間位於美國嘅餐廳。
事關佢哋唔單止搵嚟一班索爆靚女坐鎮，更玩盡夾胸、露腿，甚至半裸上陣，叫人點可能唔慾念爆燈？
近年喺美國風行嘅日式壽司，不但令美國普羅大眾趨之若鶩，連達官顯貴都鍾情呢種清新美食，但就估唔到連日本出晒名嘅「人體盛」亦傳埋過去。所謂嘅「人體盛」就係喺一位裸體靚女身上擺放壽司等人開餐。既有味覺享受，又有視覺效果。呢間位於邁阿密海灘嘅美版人體盛亦忠於原作，請嚟金髮俏女郎半裸上陣，心口兩點放上辛辣Wasabi，下身則着上性感小底褲，而身體其他部位則鋪滿壽司。當然，唔係個個都接受到人體同壽司有接觸，故餐廳可按食客要求，喺女郎身上先包層保鮮紙以保衞生。有興趣嘅人只要畀US$500（約HK$3,900），便可享受呢種另類美味。
呢間2005年開業嘅燒烤漢堡店，去年憑住重達1.444公斤，卡路里高達9,982嘅Quadruple Bypass漢堡，得到健力士世界紀錄嘅認證。不過大家咪以為呢間以巨型漢堡包聞名嘅餐廳，只係肉食男嘅樂園，事關店內嘅女侍應亦係唔少男士嘅焦點所在。低胸女護士套裝、激短迷你裙、美乳加長腿，成為呢間漢堡包店嘅亮麗風景線！點解班女侍應會以護士Look待客呢？據老闆Jon Basso講，由於佢哋嘅食品卡路里太高，擔心食客會食到心臟病，所以索性叫班女侍應以性感女護士裝待客，佢更提醒大家，入到店內記得唔好叫呢班性感女護士做Waitress，而係叫佢哋做Nurse喎！
講到乳溝、美腿、迷你裙嘅餐廳，梗係唔少得位於美國長灘嘅Tilted Kilt Pub & Eatery。呢間愛爾蘭風情嘅體育酒吧，最吸引男士目光嘅唔係呢度嘅愛爾蘭風味啤酒，而係一班身穿露臍、低胸同格仔迷你裙嘅女侍應！呢班女侍應個個好客又好禮貌，最重要佢哋相當熱情，經常同男士打成一片。呢班性感女侍應之所以個個樣靚身材正，皆因餐廳對應徵者要求相當嚴格，不但要年輕貌美、身材玲瓏浮凸，更要對體育賽事有認識，咁先至可以讓男士有賓至如歸嘅感覺，難怪有玩家稱嚟親呢度，要先養眼後睇比賽啦！
撰文：魂