一年一度嘅德國裸體雪橇大賽，喺2月底舉行，比賽引嚟數以千計嘅朋友到小鎮觀賞，造成當地交通癱瘓，差啲就搞唔成，讓大家空歡喜一場，好彩最後仍順利完成。
呢個裸體雪橇大賽，搞咗有好幾年，由原本小眾玩意，變為每年嘅盛會，今年真係一波三折，首先遭小鎮居民投訴，話會有幾千人嚟觀賞，導致交通阻塞，令佢哋出入唔方便，強烈要求取消，好在凡事有失就有得，幾千人嚟玩，可以帶動消費，令唔少小商舖搵一筆，地方官員就只好想辦法搞好交通問題，活動至可以順利舉行，但期間又有醫學權威指出，冰天雪地玩雪橇比賽，參賽者好易會凍傷皮膚，嚴重可能令生殖器造成無法彌補嘅創傷，真係嚇到唔少朋友鼻哥窿都冇肉，參賽者紛紛想打退堂鼓，主辦單位更揚言會停辦。
後嚟又有醫生話全裸接觸冰面當然危險，但如果着上內褲，就會減少受傷嘅程度，於是今年改為裸胸參賽，參賽者都要着住條底褲比賽，事情才告一段落。大會幾經波折，終於可以舉行。當日參賽者要裸胸行上一百米嘅山坡，然後高速下山，看誰以最短時間到達就可以攞到第一名，獲得獎金1,500歐元，為起嚟有萬五蚊港紙。各個參賽者抱有不同目的，部分係為咗攞獎金，有啲就為咗剝衫，又或想挑戰自己，但更多嘅係為慈善機構籌款，例如有朋友就為南極研究、乳癌基金等籌募經費。
撰文：小德