正所謂人有相似，物有相同，外人睇以為無傷大雅，但原來喺網絡世界隨時惹上一身蟻！今日帶大家睇單新聞，故事主角係一間叫Adultwoot.com嘅網絡銷售成人四仔片公司，開業已有一段日子，以超賤價發售新舊四仔，深受歐美四仔迷歡迎。點知有日佢收到全球著名嘅亞馬遜（Amazon）公司發出嘅律師信，控告Adultwoot.com涉嫌侵犯註冊商標，要求佢即時停止網站運作，否則要承擔一切法律後果。點解會玩到咁大呢？原來亞馬遜旗下有個叫「woot!」嘅網站，因為兩者嘅網名太相似，所以引發呢場官司。Adultwoot.com負責人Miss May對傳媒話面對呢類網絡巨擘，以佢呢種「蚊型」網站根本無法承擔龐大訴訟費用。話雖如此，Miss May仍然堅持搵律師團抗爭到底，佢解釋：「鹹網收入係我家庭經濟支柱，同時鹹網對社會有極大貢獻，用『woot』作為網名嘅網站多不勝數，點樣係要針對我啫！」