唔通日本嘅男士真係經常失眠？否則點會先後出現純粹陪瞓、大髀任瞓等嘅另類睡眠服務。不過講到最過癮嘅，相信非呢間位於新宿嘅「美股枕頭」睡眠專門店莫屬。顧名思義，店內有美少女提供美股畀男士當枕頭咁瞓。據佢哋介紹稱，呢種服務可讓男士心靈得到平復云云，而佢哋每日有兩位或以上嘅美少女提供服務。正如其他另類睡眠服務一樣，表示色情免問之餘，收費亦相當乸脷，每分鐘盛惠1,000日圓，折合約為87港元。價錢咁貴，唔知班男士仲瞓唔瞓得着呢？撰文：魂
一班身高腿長嘅美女，喺冰天雪地嘅環境下，着住泳衣喺London Bridge前跑嚟跑去，個樣仲相當Enjoy，唔通佢哋飲大咗？唔係，而係為倫敦一間大型海灘度假村搞宣傳。佢哋宣稱呢個活動嘅目的係為咗話畀大家知，雖然英國依家天寒地凍，但海灘度假村仍然火辣辣兼年終無休。不過話雖如此，睇到班索爆模特兒，喺冰天雪地度凍到吊住兩行鼻水，仲要扮到好享受喺度跑嚟跑去兼打排球，說明模特兒呢份工真係唔係幾好撈。撰文：魂
一直以為「見錢開眼」理應係小女人所為，但倫敦有大學研究所得，原來男人見錢開眼嘅興奮度係高過女性。大學搵嚟幾百人做研究，首先安排佢哋逗玩陌生人嘅小狗，測出男女平均興奮度只有68%，後嚟刻意安排佢哋執到10英鎊紙幣時，女性興奮度上升至83%，但男士更誇張，佢哋嘅數據竟高升至90%，所以證明男士見錢開眼係比女性為高，所以下次再有男人話：「你哋啲女人個個都係見錢開眼嘅。」你大可以用數據大番佢：「你哋啲男人先至係呀！」撰文：小德
台灣有個63歲老翁，因為家中失火慘被燒死，當消防員到場時，發現老翁手腳被綁喺床上，由於死因有可疑，所以急召警方到場，但再定眼一望，死者竟着上女性胸圍同內褲，而身上有還有很多蠟燭痕，懷疑老翁喺家中玩性虐遊戲時意外失火而產生悲劇，但一個人點玩性虐遊戲呢？於是警方展開調查，發現曾喺老翁家門口出現嘅竟係一個男人，最後仲喺老翁離咗婚十年嘅前妻口中證實，由於老翁有此癖好而離婚，所以話有啲嘢真係唔好亂玩。撰文：小德