希臘除咗係文明古國外，地中海風情更吸引到唔少外國遊客，亦係裸體愛好者嘅旅遊勝地，究其原因係擁有大量靚景，兼水清沙幼嘅海灘。美國有旅遊網站，早排精選咗4個最具特色嘅裸體海灘熱點，不論閣下想享受日光浴，定係想讓身體同大自然有最親密接觸同樣啱玩！
如果對私隱性要求相當高，唔鍾意畀(目及)嘢嘅人騷擾，呢個位於懸崖下嘅隱世海灘就啱晒。三面被懸崖圍堵嘅海灘，僅有一條小徑可以入去，而呢個海灘嘅位置，更只有當地希臘人至知。想去嘅話，除非有熟人帶路，否則好難搵到，認真夠晒隱蔽呀！
作為希臘嘅第一大島，佢唔單止係明星、富豪度假同避世嘅熱點，由於擁有極多靚爆海灘關係，因此每年吸引唔少男女裸體愛好者慕名而至。數到當中最受裸體人士熱愛嘅海灘，就係呢個Filaki Beach。水清沙幼兼風平浪靜，固然係佢嘅賣點，而另一個最好嘅地方，就係因為三面被群山包圍，私隱性高得嚟又有公路直達，難怪成為希臘裸曬首選。
顧名思義，Red Beach嘅沙粒係紅色，因此為佢平添一種特別嘅美感。作為克里特島另一個裸體熱點，當然唔單止因為沙灘夠靚，而係除咗裸曬之外，仲有多姿多采嘅水上活動，當中有潛水、滑浪風帆、獨木舟等，為裸體愛好者帶嚟豐富嘅娛樂。唔鍾意玩水？一樣冇問題！事關佢附近嘅山頭設有登山徑，唔少裸體人士都鍾意剝光豬行山，感覺超正！
如果鍾意釣魚，又想享受裸體嘅滋味，唔知邊度有得玩呢？答案就係Livadi Beach嘞！咪以為呢個係一個普通嘅裸體海灘，由於佢淺水區相當廣闊，加上附近水流中帶有豐富嘅微生物，故此吸引大量魚群游至，正好讓裸體愛好者企喺水中垂釣。一邊享受地中海嘅美景，一邊等魚獲上釣，絕對係裸體釣客嘅必然之選。
撰文：魂