四仔脫星樣靚身材正，床技更係勁到啪啪聲，你話冇人追就奇。奇就奇在現實中班脫星，又真係好難搵到男友，因此早排紐約就出現咗個專為脫星而設嘅速配活動。雖然呢個活動相當有噱頭，只係對男士嚟講卻唔係想參加就有得參加，點解會咁呢？
喺講吓點解唔係個個男士都有得參加之前，先同大會講吓點解會搞個咁嘅活動。據大會兼前脫星嘅負責人表示，佢之所以會搞個咁嘅活動，係因為有見脫星好難搵到男朋友，就算搵到嘅都係圈內嘅人，即係唔係鹹片導演，就係四仔男優，好難搵到圈外嘅異性。為咗讓佢哋擴闊生活圈子，同埋順便讓脫星搵到心儀嘅異性，因此佢哋就舉辦個咁嘅活動。雖然話係速配活動，但佢同一般嘅速配活動卻有啲分別，皆因佢係以派對形式並專揀喺酒吧進行，目的係讓男女雙方喺一個自由嘅環境下，搵到心儀嘅對象。
既然係咁健康嘅活動，點解又唔係任何男士都可以參加呢？原來有關方面為咗唔畀啲別有用心嘅男士，利用呢次機會嚟做啲唔規矩嘅行為，同埋讓男士嘅質素有保障，大會對參加嘅男士有幾方面特定嘅要求，首先就係冇不良嘅嗜好，其次就係要有穩定嘅職業同相當嘅身家，第三就係要求男士係單身之餘，最重要就係年紀一定要喺三十至四十五歲之間。此外，每次活動舉辦時都會按參加嘅脫星，定下唔同嘅要求，好似話係身高、脾氣，甚至係星座等等，目的就係為咗讓班脫星搵到心儀異性。
雖然話要求多多，但係有參加過呢個速配活動嘅男士就話，感覺同一般嘅速配活動相當唔同。事關佢本身唔算係一位四仔迷，只係間中睇吓四仔而已，點知去到呢個速配活動時，呢個竟然係一個賣點。皆因班脫星覺得喺佢面前唔使咁拘謹，可以以真面目示人喎！此外，佢最欣賞就係呢個活動嘅氣氛相當好，因為男女雙方不但唔係坐定定喺度傾埋啲無無謂謂嘅嘢，反而可以好似識朋友咁，飲酒玩樂又得，一齊跳舞亦得，甚至有啲發展得極快嘅男女，更會匿埋一角打茄輪添！問到佢點解冇揀到心儀嘅對象時，佢就解釋因為想睇多幾轉，只係佢已經抄咗對方牌，以後可以約出嚟慢慢深入了解一下喎！
撰文：峰魂簫