不求人：#o#
話說有個癡情漢，喺內地動漫展期間，向在場一位互不相識嘅騷女郎求婚，為咗一擊即中，仲以多張百元紙幣，做咗多朵紙花，決定以「銀彈花」攻勢，誓將這位騷女郎個心融化，怎料呢位騷女郎冇畀「銀彈花」打動，還叫保安到場將搞事男子驅趕，癡情漢不肯放棄，更與保安扭打起來，最後當然負傷離場啦！
不求天：+_+
其實呢個男仔真係好笨，用銀彈攻勢有個要點，用人仔摺嘅銀紙花無效，就應改用美金，唔係再改用歐元，都唔得嘅話就打朶真金玫瑰花，家陣萬五蚊一両，就打佢八両重，就算打動唔到佢，最少都唔會叫保安；另外，用銀彈攻勢千萬別喺大庭廣眾咁做，稍有腦嘅囡囡都唔答允，否則畀人唱佢貪錢就唔好啦！
不求情：QoQ
我幫個女仔講句公道說話，人哋同你三唔識七，你無情情走嚟跪地求婚，我梗係唔答應啦！你估你係無記小生，係內地模特兒都冧佢哋咩？而且我睇過條友仔嘅樣，成個宅男咁樣，唔好話內地嘅模特兒，就連港女都唔會睬你啦，表白之後，人哋唔理你，就好知難而退，仲喺度糾纏，被人打一身都好正常啫。
不求財：#-#
我覺得可能係有人想做新聞，呢單嘢如果傳咗上網後，囡囡一定被喻為乜嘢「求婚女」呀！或者係「拒婚妹」之類，跟住有網友肯定會起佢嘅底，對佢人肉搜尋，將佢祖籍、三圍、身高、興趣、初戀對象等一一放晒上網，囡囡醒目嘅就預早安排好晒，網友自然一查就查到，跟手紛紛轉貼，到時一夜成名，想唔人氣急升都幾難。