小弟身邊愈來愈多朋友食齋，佢哋話可以令身體更健康，而且仲比較環保，因為豬牛一類動物排出嘅糞便同屁含有大量溫室氣體喎。如此多道理亦說服唔到小弟改變無肉不歡嘅飲食習慣。不過，如果好似國際愛護動物團體咁搵嚟靚女，以特別嘅方法嚟勸我就應該可以。咩特別嘅方法呢？早前，國際愛護動物團體嘅成員為咗宣揚素食可以間接減低動物受虐待同殺害嘅訊息，派出女成員換上好似用生菜造成嘅胸圍同內褲，去到華盛頓聯邦議會會議廳前進行宣傳，仲大派蔬菜熱狗。由於女成員嘅露肉程度相當高，成功惹起傳媒廣泛報道。香港都有好多人食肉喎，唔知佢哋有冇考慮嚟香港宣傳吓呢？