石九公@o@：湖北有個61歲嘅婆婆，為咗見番少女時代嘅初戀戀人，於是不理家人反對，走去接受隆胸手術，希望令胸部回復少女時代咁堅挺，手術成功，一切準備就緒，可惜天意弄人，婆婆嘅老情人，原來已經等唔切先行一步，婆婆傷心欲絕，大受打擊，仲要接受心理輔導，遲啲仲話要出書，記載呢段動人故事。
黃腳（魚立）+_+：我都有睇呢單新聞，個婆婆原來係網絡小說家，佢寫嘅小說點擊率超過百萬，人氣極盛，而且佢好注重自己嘅容貌，未隆胸前已經後做過隆鼻、拉皮、削骨等整形手術，大家睇佢嘅相片頂多以為佢四十零歲，一啲都唔似婆婆，今次想見分開45年嘅初戀情人，仲隆埋胸，好多識得佢嘅朋友都唔覺得意外。
泥鯭仔>.<：但我好奇怪，佢個樣都執到靚晒，就算冇變番廿零歲嘅樣子，都唔會太差，有冇必要連個胸都隆埋，唔通擔心個初戀情人，只認得佢個胸，唔認得個樣？睇嚟佢個初戀情人，真係對佢嘅雙乳情有獨鍾，否則都唔使特別整大個胸嚟見佢。
紅衫魚^_^：如果舊情人真係對婆婆個胸咁着迷，計我話好彩佢先走一步，否則見婆婆心口仲係脹卜卜，於是情不自禁，伸手往堅挺嘅胸部一摸，呢個時候先至發現係假嘢，隨時當場激死都有之，所以先走一步都係好事，等佢帶住呢份充滿幸福嘅手感永留心底。