每次提起美國邁阿密，好多人第一時間會諗到陽光、海灘同比堅尼女郎，但係大家又知唔知，其實當地仲有貨品齊全又各具特色嘅性商店呢？早排就有美國旅遊網站，精挑細選咗當地4間性商店，等想網羅情趣用品心頭好嘅男女，能夠喺享受陽光與海灘嘅同時，又可以搵到心水第二性伴侶。
家陣避孕套款式愈出愈多，之但係講到款式之多，點都及唔上呢間位於邁阿密Coconut Grove嘅Condom USA！見佢間店名就知，Condom USA主打就係賣Condom，咪睇佢間舖細細間，原來佢裏面有超過6,000種嚟自全球各地，唔同牌子、款式、口味同造型嘅避孕套。為咗方便顧客挑選心頭好，佢哋以大細、顏色、風味等嘅方法嚟排列貨品，揀得方便之餘，配合埋細心嘅售貨員諮詢服務，想搵到心頭好就話都冇咁易啦！
喺邁阿密國際機場等上機，點知仲有粒幾鐘至夠鐘，呢個時候究竟去邊度好？梗係去喺機場附近嘅性商店Miami Playground啦！呢間性商店唔單止就腳，裏面仲有成超過2,000套精彩四仔，而店內仲有貼心嘅試播服務，顧客可以試睇完至買都未遲。此外，店內仲有各種美國至新嘅情趣用品出售，唔少新產品比其他性商店更早上架。由於佢既就腳，貨品又夠新嘅關係，至啱上機前嚟呢度睇睇。
如果閣下係四仔迷，既想買最新嘅四仔，又想搵番以前嘅經典作品嘅話，位於Miami Beach嘅Pleasure Emporium就至啱不過。事關呢間性商店主打四仔，全店有超過7,000套新舊四仔出售，不論係新鮮滾熱辣嘅作品，定係經典嘅四仔佢哋統統有齊，絕對係四仔圖書館！除咗四仔外，佢哋仲有另一個鎮店之寶遙控震蛋「Pocket Rocket」。據商舖經理Susy Despaigne稱，幾乎每位嚟到嘅客人，都會買番粒返去做手信o架！
去邁阿密旅遊，日頭陪女友，夜晚至有自己私人時抖抖，只係呢個時候好多性商店都已經閂咗門，咁點算好呢？唔緊要，喺Hialeah就有間全年24小時無休嘅性商店Caliente Adult Superstore。裏面貨品齊全之餘，經理Gerardo Lopez服務更相當貼心，隨時為客人提供專業意見。
撰文：魂