最近天氣好熱，相信唔少靚女都想以三點式示人，一來消消暑氣，二來可以晒吓驕人嘅身材，但記住喺海灘至可以咁做，千祈咪去錯地方，就好似網上流傳一輯照片，話有四個性感比堅尼女郎走去寺院參拜，搞到清淨之地，都變得火熱起嚟。
話說四名靚女，當日有專車開到深圳某大寺院門口，佢哋落車時身穿大衣，途人以為係正常香客，未加理會，但一切準備就緒，四名靚女突然同時脫下大衣，身上只着上性感比堅尼，即時身材盡顯，艷光四射，好多善信都不敢正視，以免清淨嘅心靈觸犯色戒，但四女唔只晒身材咁簡單，而且還有行動，以三步一拜，一路拜向廟宇大門，善信不敢圍觀，紛紛走避，而寺院方面就通告保安，準備相應行動，好彩四個靚女，拜咗一半路程左右，就着回大衣打道回府，避免令寺院尷尬。
事後網友當然狠批四個靚女同埋背後嘅發起人，因為當時除咗靚女外，仲有大批製作隊人員跟住拍攝，明顯唔係單純嚟拜神咁簡單，搵靚女性感參拜嚟做新聞，希望炒熱嚟做宣傳，但手段之低和對宗教嘅冒犯，可以話罪大惡極。網友就批評要囡囡玩性感咪玩性感，但唔好喺人哋佛門清淨地搞啲咁嘢，濫用所謂藝術自由嘅同時，又觸犯了其他人宗教上嘅自由，由於遭受網友猛插，所以最後有關方面只傳了照片上網，冇再炒作，總算知機，下次搞呢啲噱頭嘢，真係要諗清楚呀！
地點：深圳
語錄：囡囡賣性感，唔好沙沙滾。
撰文：小德