何家長：英國有名60歲嘅大學講師，日頭同太太非常恩愛，但一到夜晚就會拳打腳踢個老婆，呢個情況更持續咗兩年咁耐，但最搞笑就係個老公係要瞓着覺嘅時候至會出手，最後老婆忍唔住捉佢去睇醫生，先至發現老公原來患上睡眠行為障礙症，即係話佢喺全無意識嘅情況打個老婆，真係冇仇報！
何家猜：我都好想有呢個病，咁就可以將一身怨氣，發洩晒喺個衰婆身上，而且又唔怕畀人告虐妻，但好可惜，呢個咁嘅病，我個衰婆一早就有，每到夜晚好夢正酣時，佢就會出手打人，經常打到我頭破血流，而且佢嘅病情愈嚟愈嚴重，家陣佢可以一瞓落床後分零鐘，就彈起身嚟打人，快到你估佢唔到，真係冇仇報o架！
何家窮：有得呢個病一定冇咁簡單，平時兩公婆喺人前恩愛唔代表內裏就冇問題，九成雙方關係長期都出現問題，其中一方無法得到正常宣洩，於是喺夢境中報復，你話嗰股怨氣有幾深，至有能力延伸至肢體行動，所以除咗睇醫生仲要睇埋婚姻輔導呀！
何家富：如果咁講，我心裏面每晚都想執個靚女一劑，最後會唔會都出現睡眠行為障礙症，真係發緊夢去執個靚女一劑呢？如果真係諗吓就得，咁我就發達啦，事關我隔籬房住咗個單身靚女，又靚又好身材，但千祈咪搞錯房，事關佢隔籬就住咗個失婚少婦，佢想黐我好耐，最怕發緊夢入錯房，咁就晚節不保，肯定精盡人亡。