對於天體愛好者嚟講，想享受裸身於大自然間嘅樂趣，最好嘅選擇梗係去裸體度假村啦！之但係若然興之所至先去Book度假村，卻點都及唔上去裸體海灘，鍾意幾時去就幾時去咁方便。美國就有男士網站，精選咗全球三個至正嘅裸體海灘，水清沙幼固然唔少得，最重要嗰度雲集四方同好，裸都裸得有樂趣啲啦！
講到浪漫同裸體，就絕對唔可以唔提歐洲嘅裸體勝地法國，而當中尤以Montalivet嘅裸體海灘至為聞名。事關呢個海灘係世界裸體愛好者活動嘅發源地，裸體文化歷史悠久之餘，更係合法嘅裸體地點，喺度剝光豬周圍走，都唔使驚會畀人拉。此外，由於呢度咁出名嘅關係，故此年終吸引唔少裸模喺度影寫真。曬太陽兼（目及）索模，係咪好正呢？
講到熱帶風情，絕對唔可以唔提牙買加，事關呢個地方熱得嚟靚爆海灘又夠多，更有專為裸體愛好者而設嘅海灘！Hedonism除咗海灘環境一絕外，附近更有唔少專為裸體人士而設嘅設施，好似裸體Cafe、裸體酒吧、裸體運動館等，若然玩夜咗，更可入住當地嘅裸體度假村。設施咁齊全，難怪佢會入選三甲。
位於澳洲嘅Samurai Beach不但出名細沙得嚟，又夠平坦兼夠闊，不知有幾多裸體愛好者慕名而至。不過呢度除咗陽光與海灘夠吸引外，更吸引唔少裸體運動愛好者嚟玩時而波平如鏡、時而巨浪滔天，不論玩裸體浮潛，定係玩裸體滑浪都咁Fit，難怪呢個海灘被指定為每年裸體奧運會嘅舉行地點啦！
講到陽光與海灘，當然唔少得以此聞名於世嘅加州。Red, White and Blue Beach由於係私人海灘關係，喺度裸體絕對冇問題。另外，當地仲有深厚嘅裸體文化，不但攞正牌剝光豬，甚至天體露營都得！
撰文：魂