大口狗：@o@：早排連爆幾單新聞話有人自認法師，專呃啲無知少女性交轉運，等佢哋白白奉獻貞操出嚟，有人笑我哋中國人迷信，咁都會上當，點知言猶在言，英國就有單新聞，話有個49歲嘅男人自認係天上嘅使者，專向啲少女埋手，話剝光豬拍下裸照寄畀佢，佢就會傳授通靈秘訣，啲發達先進國家咪一樣有人上當。
高竇貓：€-€：我覺得神神怪怪嘅嘢，寧可信其有，不可信其無，但有一樣嘢可以肯定嘅，就係神佛又點會貪戀世人嘅肉體呢？如果有人同你咁講，九成都係老千，你打定三條九，報警拉佢都可以，除咗肉體，有時啲神棍會呃你用現金嚟祈福，就更加唔好信，所以一定要帶眼識人呀！
白皮豬：€※€：我覺得畀人呃嘅嘢，真係無話讀得書多，定係讀得書少，我夠讀到博士學位啦！但咪一樣被人呃咗，佢事前話可以為我帶嚟好運，帶嚟幸福家庭，帶嚟工作順利，仲話畀幾個聰明伶俐嘅仔女過我，但最後一件事都冇做到，而且無論肉體同金錢上，到咗今時今日仲係不斷咁苛索我，佢係邊個？咪係我個大食懶老婆囉！
牛精雄：^_^：計我話求人不如求己，命運嘅嘢，永遠係掌握喺自己手中，絕對冇必要求人，好似我咁今年命犯太歲，我咪自己去攝太歲囉！年卅晚，我團年飯都唔食，七點幾就去黃大仙排隊，踏正十二點衝入去上頭注香，成個人醒晒，到咗觀音誕我又排咗幾個鐘，仲畀我借到五千萬，全部都唔使求人，而且一分錢都冇益人添。