夏天最好嘅運動當然首選游水，若然唔想同人逼公共泳池，又有啲錢嘅話，最好嘅選擇莫過於去拉斯維加斯游水。點解要去賭城而唔係邁阿密或夏威夷？理由好簡單，皆因當地有至正、至豪嘅酒店泳池可揀。美國有網站早排就推選咗3個至正嘅泳池，靚得嚟又索女多多，不論去游水定搞泳池派對都適合不過。
想喺賭城度享受海灘暢泳嘅樂趣，Mandalay Bay係最好嘅選擇。事關呢度設有一個號稱全美最大嘅人工海灘，不但名副其實嘅水清沙幼，泳池深度更十足，玩埋浮潛都冇問題之餘，泳池仲有高達6呎嘅人工浪，玩埋滑浪都仲得！當然戲水最重要就係有美相伴，泳池內就設有無上裝泳區同夜總會，想攬住個索女戲水，就話都冇咁易啦！
講到人氣十足嘅泳池，就一定唔可以唔數Mirage，事關佢係賭城最受歡迎嘅泳池之一，你話點可以唔去？佢之所以咁受歡迎，全賴泳池糅合咗大自然嘅元素，佔地5畝嘅泳池中央有個熱帶雨林小島，泳池四周更種滿棕櫚樹、椰樹等熱帶植物，場內更設有Cafe同酒吧，最重要係佢仲有個專為男士而設嘅無上裝泳池，邊𥄫露兩點嘅索女邊曬太陽，係咪好正先？
想同一大班朋友搞個瘋狂泳池派對嘅話，Hard Rock就絕對啱晒你！皆因佢不但有37間獨立屋，內裏有唔同設計嘅泳池，好似仿真海灘、激流瀑布、細長小河等，主題各具特色之餘，隱蔽度亦十足，就算搞全裸泳池派對，都唔使擔心受不速之客騷擾。此外，Hard Rock出名係索女雲集嘅地方，男士有興趣嘅話可以邀請性感女郎一齊玩，仲隨時會有艷遇添！
想游水又要有帝王級嘅享受，Caesars Palace呢個仿古羅馬宮殿建成嘅泳池，就一定可以滿足到你。泳池依照古羅馬嘅建築風格建成，入到去好似去咗王宮咁，最重要就係佢哋經常舉辦各種火辣派對，正好啱愛玩嘅男士。
撰文：魂