劉耳達：@o@：最近美國有個18歲女學生，由於樣子甜美身材出眾，於是忽發奇想，影咗張超性感照片，放喺自己嘅畢業紀念冊裏面，點知學校認為照片太出位，所以拒絕，呢個學生妹就乘機搞大件事，成為全城熱話。最後照片有冇放喺紀念冊就唔知道，但學生妹咁樣一搞，就引起荷里活導演嘅關注，仲簽咗佢做明星添！
劉佳零：^v^：原來成名咁容易，早知我都用呢條橋啦！不過我會改一改，唔係同學校作對，而係同政府作對，我將所有證件相，都換晒做性感肉照，佢哋唔肯收，我就開記者會，指控受到迫害，跟手憑歌寄意，即時喺傳媒面前高歌一曲，如果安哥嘅話，仲可以唱多幾首，到時仲唔一曲成名，使依家咁辛苦，日捱夜捱咩！
劉黑酸：$(Ъ($：我就話世風日下，邊有女仔咁不知廉恥㗎！好好一本紀念冊你咪放張書呆子嘅照片落去囉！就算可以放生活照，咪放張日常生活照落去囉！點解係要放張性感照落去，唔通佢嘅學生時代回憶就只有性同肉體咩？生活就算真係咁糜爛，都唔好咁揚嘛！
劉達華：€※€：我覺得成個鋪排，就係一個局，因為正常人都唔會搵張用紗布紮住對巨乳嘅相片放喺紀念冊，個囡囡攞得番嚟，就預咗學校一定唔會收，於是囡囡就乘機發難，開晒記者會，又話遭人歧視，又話冇晒自由，最後再經網民一炒，自然滿城風雨，跟手導演出場，話要簽佢拍片，表面好圓滿，實際就係一個騙局！