大佬一：$￭$：早幾日睇娛聞，又有某女星慾照浮面，搞到當事人好不尷尬。其實呢啲慾照近年真係見得好多，除咗知名人士外，普通人嘅慾照流出亦有不少。只係我覺得好奇怪，點解咁多人情到濃時鍾意影慾照，唔通佢哋唔擔心，萬一慾照流出咗嘅話，將會為自己帶嚟長手尾咩？
陳二妹：*€*：你都識得講係情到濃時啦！情到濃時，試問有邊個會咁清醒呢？喺嗰一刻當正對方係自己「永遠」嘅一半，邊諗得到一頭半個月後，會同對方分手至得㗎？就係因為嗰一刻嘅衝動，同埋畀愛情沖昏咗頭腦，咪影落咗啲性感慾照，甚至係火辣十足嘅床照，到咗清醒嘅時候咪至嚟後悔囉！
李龍三：@o@：其實影慾照我又覺得唔係乜嘢問題，只係Keep相嗰個點解會畀呢啲相有機會流出呢？情況就好似日記咁，你唔會下下將佢擺上網，等人哋睇吓你嘅心事，因為呢啲係私隱嚟！更何況，呢啲唔係只係會影響到自己嘅相，仲要係會影響埋其他人，更加需要落力保密，咁先至係負責任嘅表現。
張四哥：^v^：計我話所有嘅慾照，好應該喺分手當日即刻刪除，留番喺度作為留念？咪玩啦！唔通用嚟重溫曳曳時嘅快感咩！對於影咗又未分手嘅情侶嚟講，呢啲相亦係可刪就刪，因為世事無絕對，點知道以後會點，更何況，咁好彩真係冇分手，以後畀啲子孫睇到都唔好啦！