剩女W：#v#早排睇到單新聞，又有一個偷拍人哋裙底嘅鹹濕佬落網。睇到呢單News時，我不知幾咁開心呀！因為我好鍾意着短裙o架嘛！尤其係熱天，唔着短裙嘅感覺好焗，而呢啲人又神不知鬼不覺咁，趁人哋唔為意時就影裙底，真係好衰格o架！拉咗啲咁嘅人，我哋咪放心行街街囉！
大哥Y：@^@偷拍人哋裙底係賤格，呢啲人確係抵拉！不過話又講番轉頭，點解班鹹濕佬會有機可乘先？咪就係因為啲女士着啲裙實在太短囉！若果佢哋着嘅係長裙，班鹹濕佬又點會咁容易得手呢？所以話如果唔想畀人偷拍或走光嘅話，咁咪從今日起，唔再着迷你裙。
街女Z：＊o＊樓上咁講就唔啱喇！唔通女士着短裙露底畀人睇到，以後唔再着短裙咩？更何況迷你裙一啲都唔暴露，只係啲人鹹濕之嘛！須知道班偷拍佬，唔係因為我哋着嘅裙太短，而係佢哋專登跟喺尾，將部手機攝喺人哋裙底度影，呢點同條裙長定短冇關係，樓上絕對唔可以咁講嘅！
君子H：$o$我就好認同樓上嘅講法，皆因着迷你裙係冇錯嘅，只要唔係太過短，短到喺樓梯後面只要抬起頭就睇到就得。我就見過個女士，佢條裙真係勁短，佢喺我前面行緊上樓梯，我只要一抬頭就見到佢條底褲，感覺真係勁尷尬呀！佢呢種做法真係唔抵幫，因此希望各位女士顧己及人啦！