每年中秋節，香港人除咗會四出賞月之外，大坑嘅居民仲會舞火龍，寓意驅走疫病，帶來好運。據講呢條火龍極長，所以要出動上百人至可以抬起嚟舞，場面壯觀之極，所以每次都吸引好多人慕名而來觀賞。而講到火龍，最近美國佛羅里達州就出現一條最長嘅火龍，不過就唔係大坑舞嗰種，而係一條火辣人龍，如何火辣之有？3月6日，美國佛州一個海灘上面，出現咗一班欲破健力士世界紀錄嘅美女，佢哋為數450人，個個都身穿火辣比堅尼盡騷身材，然後列隊遊行，令現場氣溫急升！據講，呢條火辣人龍已經打破2011年10月喺澳洲舉行嘅357位美女比堅尼遊行嘅紀錄。