最近有個桑拿網站訪問咗三百幾個囡囡，問佢哋最想嫁畀乜嘢外地人？選擇中包括香港人，但好對唔住！結果排名五大不入，以前當係寶嘅港人，家陣完全唔值錢，大家真係要檢討一下，至於佢哋最喜歡嫁畀乜嘢人呢？我哋馬上揭曉頭四大。
第四位係澳門人，唔係嘛！竟然想嫁畀澳門都唔想嫁畀香港人，囡囡嘅解釋話澳門人冇咁歧視啲內地人，而且佢哋政府每年都有錢派，就算係新移民都有，加上消費比香港便宜，嚟打工壓力亦冇香港咁大，佢哋真係一針見血，認真有見地呀！第三位係美籍華僑，據啲囡囡話嫁到去金山，就算老公唔係太有錢，但感覺都會威啲，喺啲親友面前唔止抬得起頭做人，講句嘢都會八面威風，而且老公只要喺嗰度有工做，估計生活都唔會太辛苦，萬一冇嘢做生活保障都會好過好多地方。
第二位就係生活喺內地嘅外國人，好多囡囡都話同外國人雖然言語溝通唔到，但佢哋好多都好好人，對佢哋既溫柔又體貼，而且佢哋嚟得內地嘅，唔係做生意，就係大公司嘅員工，所以經濟方面一定唔使擔心，揀佢哋做老公，係唔錯嘅選擇。
至於第一位嘅就係台灣人，囡囡話佢哋大多數都係大公司要員或者老闆，經濟方面自然唔成問題，而且大家溝通又容易，唔會有咁大嘅隔膜，有部分囡囡仲話台灣嘅男生比較靚仔，九成受咗台灣偶像劇影響，實際情況邊有咁多囝囝同埋羅志祥呀！
撰文：小德