子彈仔：早排搬新屋，難得可以同條女同居，梗係添置過啲新影音設備啦！於是我第一時間去買咗套五點一環迴立體聲音響，等我睇四仔時更加過癮。點知女友話我變態，睇四仔使乜咁好享受，因此極力反對。佢都唔明，對麻甩佬嚟講，睇四仔好重要架嘛，你哋同唔同意先？
同路仁：我梗係同意啦！佢都唔明同屋企人一齊住，睇四仔嗰種難受法。好似我咁，特登買咗個超密封嘅耳機，方便我睇四仔時唔會漏聲，費事搞到大家咁尷尬之餘，仲可以有咁大聲扭到咁大聲。須知道，如果聽唔到聲嘅話，享受會大打折扣。如果我有錢搬出去住嘅話，我都會學似你咁買套音響呀！
黑百合：如果係我條仔，用咁嘅理由話要買套新音響，我都會唔畀喎！點解？無他嘅，睇四仔係為咗睇脫星嗰三點，同埋睇吓佢哋點樣喺度曳曳之嘛，使乜要用到幾點幾嘅環迴立體聲喇叭先？更何況，套音響搞到咁勁，即係睇嘅時候要有咁大聲扭咁大聲啦！萬一畀隔籬屋聽到，真係超醜怪呀！
柑蕉男：女人都係唔明，男人睇四仔時嘅刺激性，並唔係僅僅嚟自眼睛，聽覺享受都好重要o架！否則，班脫星上到床，只需要喺度狂扭就得，使乜要擘大喉嚨係咁嗌呢？搞到好似做默劇咁，真係你睇埋我份！不過話說回來，樓主你又係嘅，明知女人唔明男人點諗，你就應該畀第二個理由佢，費事佢咁多嘢講啦！