好快又到內地高考嘅季節，學生們寒窗苦讀多年，就係睇吓今次考試，決定讀唔讀到大學，所以個個都十分緊張，而且由於只有縣級地方至有考場，所以唔少農村嘅考生，都要喺春節後搬入城市暫住，希望專心讀書，但當中誘惑實在不少。
呢啲農村出嚟嘅學生，十居其九都未見識過城市燈紅酒綠嘅世界，家陣一個人出到城市備考，仲唔立即放縱一下，四出閒逛，由於佢哋出得嚟備考，家中經濟環境一定唔差，於是色情販子就會向呢啲學生哥埋手，搵啲美少女喺街上兜搭，跟住就投懷送抱，學生哥把持唔住，就會輕易上當而沉迷女色。其實咁都算小事，最怕遇上老千集團，搞到要父母贖身就大件事，但咪以為學生哥唔出街就冇事，家陣互聯網咁發達，匿埋屋企溫書嘅朋友，一樣會被色情販子搵到上門，令佢哋泥足深陷。
雖然有啲父母就會跟埋個仔出去做「陪讀」，但不可能廿四小時貼身照顧，好似舊年就有單新聞，話有個考生喺網上兜搭上一名「Q女」，「Q女」多次要求見面，最後考生應約，點知就墮進天仙局，遭人勒索三萬大元，佢老媽只好返去鄉下，籌錢贖回兒子，真係攞嚟搞。所以奉勸啲學生哥都係專心啲讀書，冇乜事唔好周圍去，兼且唔好亂登入一啲交友網站，否則破財失身事小，影響埋考試成績，咁就浪費晒咁多年嘅努力，一定要記住呀！
撰文：賢