過完年，內地好多工廠都相繼開工，於是廠家又忙住辦春茗，希望藉此聯絡吓員工同客人嘅感情，而近年唔知係咪受咗台灣廠商嘅影響，每有酒宴都喜歡請啲歌舞團嚟演出，據講有唔少老闆仲講明要囡囡剝光豬嚟載歌載舞，絕對係人慾橫流。
據歌舞團嘅負責人秋哥講，情況真係愈嚟愈多，秋哥話：「以前客人只要舞蹈員夠性感就可以，後嚟話性感都唔要，要舞蹈員剝光豬嚟演出，我哋要去夜場搵班識跳舞嘅囡囡嚟客串，先至頂得住。之後仲變本加厲，要求連歌手都剝衫示人，我哋真係好頭痛，邊有歌手肯剝衫嚟唱歌吖！我哋咪惟有搵啲肯剝衫嘅囡囡，再事前幫佢哋安排幾堂唱歌訓練，只要唔好走音或者五音不全，少少技巧唔熟練，客人都可以接受，家陣我哋訓練過肯脫又識唱嘅囡囡，就有5、6個，隨時奉命演出。」
咁客人見到囡囡剝光豬演出，反應會唔會失控呢？秋哥話：「內地客人比較含蓄，佢哋只係眼光光咁睇，反而要囡囡主動落台搞氣氛，特別係主家嘅管理層，好多都好怕醜，但如果去客人嘅枱，佢哋唔使顧形象，好多都飛擒大咬，上下其手。」咁惡撈，究竟好唔好搵呢？秋哥話：「我哋除咗春茗之外，年中會比較淡，所以只係做一兩月嘅生意，但足夠一年開銷，所以收入都唔錯。」據講每一場騷，佢哋開價十萬八萬，接到十零廿場，真係十分和味。講到咁吸引，真係好想去見識吓呀！
撰文：賢