為過春節，好多朋友想坐火車返鄉下，都一票難求。但係好多喺東莞夜場返工嘅囡囡，佢哋十居其九都已經買好晒火車票，點解咁有本事呢？原來正所謂蛇有蛇路，鼠有鼠路，自然有方法。
咁有啲乜嘢方法呢？最常見嘅就係由公司安排團體購票，老總一早安排好晒囡囡嘅收爐時間，唔係年廿六就係年廿七，喺預售日開始，就派專人去排隊輪候，據講買票嘅朋友，真係排咗幾日隊至買得到，呢位仁兄真係辛苦晒，但車票未到囡囡手上，老總就係要佢哋乖乖哋做到收爐，所以期間囡囡表現一流，永冇遭到客人投訴，全係為咗張火車票。此外，有啲囡囡就拜託同鄉代買，大家都喺同區做事，過年回家正好有個伴，一齊買火車票，途中大家仲有個照應添。
火車票咁難買，據講原因係好多都落入咗黃牛黨嘅手上，囡囡如果用唔到以上兩個方法，佢哋就要拜託公司或者附近有勢力人士代為出頭，喺黃牛黨手上買票，咁做當然就要欠下人情，同時車票會貴好多，但返鄉下嘅時間就唔使畀人限住，而且兩三日之內，車票就會到手，唔怕畀老總控制住，揸頸就命，對於一啲個性較強嘅囡囡，大多情願用呢個途徑自己買票。至於欠下有勢力人士嘅人情，用乜嘢還？有時食餐飯就可以，但通常都係票債肉償，所以返鄉下真係唔易架！
撰文：小德