今年小弟總共參加咗四次婚宴，最陰功係每個婚宴嘅節目都係一式一樣，先由兩個所謂司儀講一輪廢話，再播吓片段，咁先至可以食得擺到凍晒嘅乳豬，真係悶到發慌。早前江蘇嘅一個父親就做得好喇，因為佢個仔娶老婆擺酒當晚，為咗提升氣氛，與一眾村民同樂，於婚宴期間，請來脫衣舞孃表演助興，吸引超過200名村民到場支持，阿仔真係威到盡喇。之不過，由於表演太出位，所以呢位父親後來被公安部門檢控，罰咗二千人仔。其實大家於婚宴中加插新環節，亦可以學吓佢，不過就唔使玩到跳脫衣舞咁激，請三點式女郎行吓騷咪得囉。
撰文：小德