老友因為工作關係，畀公司調咗返內地短駐三個月。老友本身經常北上玩樂，今勻仲唔有咁飽玩咁飽咩？點知公司宿舍規定唔可以帶女返去，於是喺佢軟硬兼施下，氹到老細畀佢喺外面租屋住。不過對租開屋嘅人嚟講，都知道三個月嘅屋好難租，於是佢就諗到一啲專攻短租客嘅公寓，實行將公寓變炮房喎！
正當佢以為可以夜夜曳曳之際，卻發現呢棟公寓居然係公安嘅「經常性拜訪」對象，佢住咗兩日，就嚟足兩晚，仲要唔係入嚟簽簿咁簡單，而係真係拍門入屋巡一巡。雖然老友時運高冇心急嗌女嚟玩，但已經嚇到佢鼻哥窿都冇肉。問吓其他租客，原來嗰棟大廈外地人多，當中更有唔少三無人士，故此成為嚴打對象。為免日後麻煩，佢拿拿臨搬返公司宿舍住。我聽到佢咁講，就問佢點解唔租酒店公寓呢？老友嘆口氣話：「酒店公寓貴嘛！當初諗住租間平房，慳啲錢出嚟，可以玩多幾劑，點知卻因小失大囉！」
特攻語錄：公安晚晚嚟拜訪，囡囡未嗌已驚惶；慳嗰幾百嚇餐飽，不如短租酒店房？
撰文：鋼炮仁