播種特攻：吹水唔抹嘴

猶記得上個月初，有老友帶埋個飯盒出嚟食飯，嗰個囡囡姿色一般，身材亦係普通。不過各花入各眼，加上嗰晚我有節目，所以食咗冇耐就走人。今個月重遇老友，佢話飛起咗個飯盒，唔再搵佢咁話。我份人八卦，問佢發生乜嘢事。

佢就話：「條女質素係點，相信你仲記得。本嚟我覺得佢份人好直，呢點好吸引，點知相處後發覺佢吹水唔抹嘴，又話網上有個有錢佬溝佢，又話以前條仔發咗達，有成十幾億身家，問條女想唔想跟番佢。嗱！本身我聽完就算，心諗你咁嘅姿色，既然有好路數，鍾意咪走囉！殊不知條女話好愛我，只係物質上滿足唔到佢，然後要我送呢樣，買嗰樣，一個月使咗我成幾餅嘢，仲嫌啲嘢太Cheap，有幾次仲要發老脾走咗去，你話呢啲女係咪抵飛先？」梗係抵啦！