大家一定以為提供廉價色慾服務嘅髮廊，九成九會開喺啲非常隱蔽嘅橫街窄巷，但係世事無絕對，好似喺溫州就有一個新開發嘅社區，裏面豪宅林立，就喺小區內嘅河邊一角，竟明目張膽開咗一排髮廊，唔通佢哋專做有錢人生意？
呢條街全長二百多米左右，大大話話都開咗廿幾間髮廊，日頭暫停營業，只要華燈初上，啲五光十色嘅霓虹燈就會開晒，整條街都好靚，每間舖仔裏面坐咗六、七個囡囡，佢哋打扮入時，衣着性感，只要有男人行過都會搭訕一番。
由於舖仔細細，除咗門面就只得個洗手間，如果客人想有下文，就只好出街另覓戰場，但原來佢哋除咗做街客，主要客源就係靠背後嘅豪宅客人，只要一個電話，囡囡就會馬上送上門，有時放工返嚟未食飯，叫囡囡買埋飯盒、避孕袋都冇問題！
咪以為買飯盒啲咁瑣碎嘅事，需要啲囡囡効勞，其實叫佢哋買飯盒，就係方便出入屋苑，呢啲豪宅可以話門禁森嚴，普通人出入都要登記，但如果係嚟送外賣嘅，保安都會懶得登記，囡囡只要遞高盒飯表示嚟送餐，就可施施然入去。
上到大廈之後想同客人做乜都可以，而且每次收費只係二百至二百五十蚊，認真超值，所以深得豪宅住客嘅歡迎，由於附近足足有成四個屋苑，有成萬戶咁多，總有啲單身漢需要別人照顧，亦因為咁令髮廊生意大旺，開完又開。
撰文：賢