玩家聽到沉船呢兩個字，往往好理性咁發表意見，叫玩家斬纜嘅原因，不外乎話囡囡賣肉只係搵錢，唔係談感情，或者係話囡囡為咗呃錢，邊會拋個心出嚟云云。雖然我唔贊成搵歡場囡囡談感情，但亦唔會阻止身邊老友沉船。唔係我冷血或冇義氣，而係正所謂針唔拮到肉唔知痛，對方意見接受，但態度照舊，講嚟都嘥氣，最重要係講得多，搞到連老友都冇得做，你話幾咁煩呢？
好似有個老友咁，佢早幾年迷上個囡囡，我極力勸阻無用後，就同佢講沉歸沉，咪瞓身落去，結果老友拎咗寡佬證北上，同囡囡拉埋天窗。老友當年解釋，囡囡呢幾年搵咗唔少錢，樓都有幾層，從良後生活無憂之餘佢亦放心。點知囡囡有鋪打麻雀癮，幾年落嚟樓輸晒，老友更貼埋錢幫拖還債。老友都算唔話得，死慳死抵照揼錢養老婆，可惜對方嫌生活水平下降，居然偷偷地走私鐘不特止，仲帶埋恩客返屋企，兼畀老友撞破。老友雖然嘴硬話感情事好難講，又話曾經快樂過等等，我聽到亦費事追問，懶得再同佢嘈，不如風花雪月好過。不過話說回來，囡囡搵慣皮肉快錢，又點肯真係去捱，係咪？
特攻語錄：沉過方知心痛，心痛更甚肉痛！
撰文：鋼炮仁