色日放送:風俗孃為生計 兼職賣底

日本經濟唔好,據成人網站調查所得,近年風俗孃嘅收入已大不如前,所以家陣有七成嘅囡囡,都要靠賺外快嚟維持生計,而佢哋最多係做乜嘢呢?原來就係搵客人嘅着數,但請放心,唔係敲腳骨勒索小費,而係額外再提供特別服務。

衣服乾洗

囡囡提供嘅額外服務,並唔係性服務,因為做多幾次都係公司收錢,就算分到一半,都獲利甚微,所以好多囡囡都想辦法,提供一啲非一般嘅服務,好似有囡囡就同時鐘酒店掛鈎,當入房剝光客人衣服嘅時候,就提議安排乾洗,揚言兩小時大家肉帛相見,最好就係利用呢啲時間將衣服洗乾淨,客人自然乖乖哋聽話,就算牛記笠記都照攞去乾洗,囡囡可收取一百幾十蚊佣金。另外,有好多囡囡就賣自己着過嘅底褲,熱辣辣,香噴噴,據講每條成本幾蚊港紙,但一轉手就賣到一千幾百,真係好賺!

推銷商品

據調查所得,最多囡囡做嘅兼職,就係推銷商品,呢啲商品真係包羅萬有,好似健康食品、情趣玩具、家居用品等,仲賣埋壯陽藥添,佢哋推銷嘅時間,通常都係喺同客人大戰完之後,大家換好衫,但又未夠鐘走嘅時候,囡囡就會攞呢啲產品出嚟起勢「揚」,客人好奇追問時,佢哋就打蛇隨棍上,講到啲產品天上有地下無,好多時客人都會買一千幾百蚊嘢當係應酬吓,囡囡每次獲利唔多,但有咗呢個關係,客人日後自會同囡囡保持聯絡,兩邊生意都會豬籠入水。

撰文:小德