Club唔一定係夜總會，有啲大型嘅的士高，都會叫做Club。講到全個歐洲最大嘅Club，就要數呢間位於英國布力般名叫「The Syndicate」嘅Club！
呢間Club樓高三層，最多可以容納四千三百個玩家，喺的士高內狂歡。為咗滿足唔同蒲友嘅需要，的士高內分為四個部分，分別係三個主題舞池，及供蒲友聚會嘅VIP房。講到主題舞池，就一定唔可以唔講位於一樓嘅「Dance Arena」。呢個可以容納兩千五百人嘅巨型舞池，配有強勁嘅音響設備。唔好睇小呢個設備喎！原來當年曾經攞過全歐最巨型、至正嘅的士高音響設備大獎。喺度聽佢焚音樂，真係High！
此外，的士高每晚會請嚟性感嘅Dancer，同埋著名DJ嚟表演。為咗可以讓蒲友玩得更興奮，的士高亦會定期搞活動，好似自由搏擊比賽、重量級拳賽、比堅尼小姐選舉等。不過蒲友去呢間的士高蒲之前，記得先要留意佢嘅開放時間，皆因並非一個禮拜開足七日，只係會喺星期四、五同六嘅晚上十點至四點做生意。另外，佢每晚兩點後，就唔會畀人入場。有人可能覺得咁嘅安排唔方便，但事實話畀我哋知，呢個場幾乎晚晚爆棚，甚至有時排隊都未必入到場，足見呢間自認全歐最大嘅Club，人氣有幾咁高！
撰文：阿豪