今日紅假，唔知大家準備咗咩活動慶祝呢？不過，呢種日子出街慶祝，極之多人，不如就趁人人上街，你就約埋班Friend去郊外玩吓，回歸大自然啦！享受陽光與海灘係一個好主意，但係學吓外國人咁，剝光豬行山，可能會有更深刻嘅體驗喎。
夏日陽光普照，令人精神爽利，呢個時候去沙灘玩就最爽喇！爽在我哋除咗可以享受日光浴，同清涼嘅海水，仲可以得到視覺享受。試問沙灘又點會缺少性感嘅比堅尼女郎呢？之但係，雖然香港嘅沙灘環境唔錯，不過我都係想去外國嘅沙灘，事關外國有好多天體沙灘，男男女女都剝光豬融入自然，咁至叫做真正擁抱大自然。呢類天體愛好者唔單只喺沙灘裸露，部分仲會玩裸體打排球、踩單車，較早前佢哋甚至發起裸體坐過山車，而近年佢哋亦開始興起玩裸體行山。裸體行山人士熱愛大自然之心相當強，覺得行山同露營可以令人體驗到大自然嘅優美，後來佢哋覺得，學政府宣傳片呼籲咁，着長衫、長褲行山，唔夠以自己嘅身體親近大自然咁貼身，所以，決定唔着衫褲去行山。
喺歐洲、美國唔少國家都有裸體行山愛好者，例如瑞士小鎮阿彭策爾（Appenzell），就漸漸變成裸體行山者嘅天堂，仲吸引埋唔少德國人「裸」嚟行，搞到小鎮四圍都係條條Fing嘅男人，及三點盡露嘅女人，居民覺得有礙觀瞻兼夾有傷風化，所以喺2009年當局就禁止裸體行山活動。
雖然瑞士唔准玩，但係好多國家仲有地方畀佢哋玩，例如美國嘅新澤西州就有山區容許呢類活動，仲有團體定期舉辦旅行團添。其實，你想順利剝光豬上山親親大自然，有唔少事項要注意，呢啲團體就提供唔少貼士畀同好喇。首先，裸體行山點都要帶個背囊，裝食水、食物、地圖等用品，行山鞋當然係必要架生，咪真係兩手空空咁上山咩。時間上，揀啱啱日出嘅時候會比較好，團體表示有攻擊性嘅動物通常都喺夜間行動，日出佢哋就返歸抖抖，所以呢個時候上山比較安全，特別係身上冇衫肉香誘人嘅裸體行山人士。第三，大家要注意目的地山區有冇有毒嘅植物，如果山上面有令人產生皮膚敏感嘅漆樹就要小心，除非有人想增加重要部位嘅體積啦。
雖然唔少地方都容許裸體行山，但係都未能名正言順，最近德國東部一條小村莊Dankerode就為好此道者帶來好消息，因為當地一個營地及餐館嘅老闆Ludwig，成功為裸體行山人爭取到世界首條全裸行山徑！Ludwig本身係一名行山愛好者，知道唔少地方都歧視裸體行山人士，就為佢哋覺得不值，經過一段時間向當局申請之後，終於感動到當局批出呢條裸體人士專用行山徑。而Ludwig為方便裸體行山人士，喺行山徑開放之前，特別上山將沿途嘅帶刺植物一一清理好，等佢哋上山都唔會咁容易被刺傷，實在令人欽佩。
撰文：賢