報載北京有個「嫁個有錢人課程」，費用兩萬人仔，年內有過千女性報讀，難怪喺鄉下地方，骨場技術課程都有女信啦！
我大軍起初都覺得出奇，但設身處地用佢哋嘅文化同思維諗就變得好合理。花兩萬學嫁個有錢人，不如介紹有錢人實際，唔係無知係乜？一位常平骨場經理對我講，家陣有骨場已經唔係做「骨場」生意，反而係呃同胞賺錢。原來佢哋喺啲鄉下地方，開設辦公室，以訓練骨場技師為名，完成課程後更可安排到骨場實習，少受教育嘅鄉下妹以為執到筍盤，借埋屋企人棺材本報讀，無良骨場老細賺到盡，而「骨妹」嚟到至發現完全搵唔到食！
之所以咁多女相信，除咗因為無知，亦因為骨場「製作」認真，先安排職員面試，收學費後更有專業技師教授，學足十堂再派到骨場返工，據報費用超過萬元，至於有冇客搵你恐怕機會近乎零，皆因骨場都冇客到，骨妹又點會有機會上鐘，撈唔掂就閣下自理喇！
撰文：大軍