本地有黑心女導遊唱衰港人，可恥！之不過歐美四仔界亦有脫星唱衰脫星，搞到一批準新人唔敢入行，有陰謀論指脫星Ash Hollywood係希望少人爭飯食，可以更鞏固自己嘅地位，亦有指阿妹多多聲氣無非係博出位，希望得到外界關注！
撰文：祖
脫星唱衰同行關你乜事？梗係關啦，理由係脫星數臭業界難撈，少不免會令有意投身行業嘅索女卻步，咁搞法，麻甩佬少咗女睇自然躁底，影響性生活就牽連日常工作效率，咁你話係咪火滾先！涉嫌係幕後黑手嘅Ash Hollywood至今都唔認有做過對脫星界不利嘅舉動，但網友就將阿妹網誌留言轉載，例如佢話美國四仔從業員係全地球休息最少嘅一群，又指四仔工業衞生環境差，更指男優對身材曳嘅脫星會出言「問候」！哈，有證據喺手，阿妹無得抵賴，但Ash Hollywood對此只承認係發洩。「網誌係抒發情緒嘅好地方，不少網友都會將日常生活所見所聞上載分享，只不過我係脫星，外界對我特別關注，若然出自一位四仔幕後工作人員，大家就唔會有如此反應！」
Ash Hollywood嘅解釋非常牽強，難怪連行頭上下都話佢居心叵測，據聞姊妹都要即時同佢劃清界線，以防被列入黑心脫星一群。雖然留言的確係阿妹所寫，但問題係究竟四仔界是否如所述咁黑暗呢？有自稱從事四仔幕後工作人員就力撐Ash Hollywood，更於網上大爆業界黑幕，尤其係老牌男女脫星對待新人態度，一有唔妥就出言問候，令在場工作人員都睇唔過眼，亦有另一名燈光師話新一代脫星不知所謂，完全唔跟工作流程，崇尚個人主義、返工冇時間觀念，現場不分尊卑等等，嚴重影響四仔拍攝進度，因此被前輩「問候」都係自己攞嚟喎！哈，真假對錯就留待大家自己判斷喇，但肯定Ash Hollywood呢鑊要洗底就有排搞囉！