爛賭嘅人真係好難得到別人同情，好似我有個老友明哥，幾年前認識咗個桑拿妹，後嚟兩個住埋，桑拿妹見搵到個好男人，於是唔再做桑拿。明哥喺內地係替老友睇廠，月入幾萬，所以養埋呢條女都唔成問題，不過佢哋恩愛咗一段日子，問題就出嚟。
原來呢個囡囡非常爛賭，日日夜夜都打麻雀，二四六就賭六合彩，舊年當黑，買乜輸乜，欠下一屁股債，搞到要明哥救佢，條女喺明哥面前又喊又跪，話過要斬手指戒賭，明哥見一夜夫妻，於是同佢孭咗條數，但賭癮嘅嘢，你話要戒就戒得到嘅咩？
最後一劑又一劑，明哥足足替佢還咗十幾萬，惟有忍痛，畀咗三萬蚊佢，送咗佢返鄉下，以為佢會改，點知條女返到鄉下一樣照賭，最後又欠下巨債，明哥話過唔再幫佢，條女焗住喺老家做流鶯還債，聽見都心噏，唔爛賭咪乜事都冇囉！
撰文：大軍