家陣喺內地工廠打工，最少嘅工資都有兩千蚊一個月，以一個廿歲仔嘅中學生嚟講，都算係唔錯嘅收入，而且工廠包食包住，呢兩千蚊可以話係純收入，所以有雞頭就睇準呢個市場，喺大型工廠區附近，搞咗唔少帶有色情成分嘅休閒活動中心！
所謂休閒活動中心，並唔係我哋去開嘅揼骨足浴中心，而係喺晚上開放，安排好多文娛活動嘅場所，其實有少少似我哋嘅青年中心，但全部都係由私人開辦，所以提供嘅活動比較普通，唔係打波就係唱歌跳舞，原意係幾健康嘅，但點解會變質呢？
咪因為人流夠集中囉，由於呢啲年輕工友，放咗工之後就無所事事，於是走晒嚟呢啲活動中心消費，每晚人流多達千幾人，聰明嘅雞頭見機不可失，於是派囡囡嚟呢啲中心兜生意。
由於家陣工廠男多女少，所以放工一街都係男仔，想見個女仔都難！突然間喺呢啲活動中心，出現咗十零個年輕靚女，班入世未深嘅男工友，仲唔蜜蜂見到蜜糖一樣，圍住佢哋氹氹轉咩？而呢啲囡囡亦唔心急，因為男仔太多，佢哋會揀一啲初級管理人員或者帥哥嚟埋手，如果你冇錢又唔靚仔，咁就注定冇運行啦！
囡囡會同心水嘅男工友打情罵俏，跟手喺中心裏面玩吓，當大家都熱好身後，就會約男工友出外飲杯嘢，其實就係同個男工友講價錢，一般嚟講，短聚價約二百蚊左右，包夜就要求五百蚊，以一個打工仔嚟講，價錢可謂十分合理，一啲都唔貴！
而男工友答應嘅話，囡囡就會帶佢哋去附近嘅民宿進行交易，房租當然要畀，一般約五十至八十蚊左右，同去廉價旅館差唔多，但就比較安全，至於會唔會畀人布天仙局，咁就講唔埋，但正常交易後，派彩完畢，囡囡會再返活動中心，另覓新工友。
由於整個過程好似艷遇咁進行，所以有關方面都幾難打擊，加上活動中心見囡囡嚟消費，亦冇理由會趕人走，所以助長更多雞頭嚟搵食，據講一間中型嘅活動中心，裏面就大約有四五批雞頭喺度搵食，加埋囡囡近五十人，可想而知市場有幾大！
撰文：小德