最近睇內地嘅報紙，得知全國好多大學，正紛紛進行面試，好似最多人爭嘅藝術表演系，有部分名校更出現幾千人爭幾十個學位嘅情況，學生們除咗要施展渾身解數之外，有時仲不惜諗辦法「走後門」，於是就有騙子出嚟乘機撈好處。
據講佢哋會認係某某教授或主任嘅親友，如果要順利入讀，最好就係認識呢位教授或主任，學生當然抱有好大希望，但騙子就會要求一筆相當大嘅介紹費，如果學生因經濟問題而未能湊足數目，就要錢債肉償，學生為求一個機會，亦會不惜犧牲色相。
如果事後發現被騙，學生們全都唔敢報警，因為佢哋仲要報讀其他大學，如果事件一搞大，就會冇埋其他入讀嘅機會，所以學生們除咗要小心帶眼識人之外，走後門拉關係嘅事都係少做為妙，何況家陣咁多電視選秀活動，要入行唔使咁大犧牲嘅！
撰文：大軍