大軍識得一個玩家，記得佢以前每次北上落夜總會溝女，例必要揀番個識講廣東話嘅囡囡，貪佢可以溝通咁話。不過早排發現，老友再冇咁樣要求，反而鍾意揀個識講普通話嘅囡囡，問佢點解有咁嘅變化，佢就笑笑口話：「囡囡唔識講，又唔識聽廣東話，好玩好多架！」老友解釋，試過一次喺囡囡面前同朋友講，話囡囡嘅服務一般，價錢貴咗啲，如果臨埋單時嚟減價，應該可以畀少啲。點知囡囡聽到就發晒老脾，叫老友拿拿臨磅水兼走人。老友自知理虧，惟有畀錢就算，而從此以後，佢就開始搵個唔識得聽，又唔識得講廣東話嘅囡囡做拍乸，貪佢乜都聽唔明，講秘密都唔知喎！