小弟先恭賀大家2011年新年愉快，事事順利，六合常中，財色兼收！祝福歸祝幅，新一年都係靠自己發圍最穩陣！但係點樣先可以令自己有力發圍呢？先決條件梗係要有鬥志同活力去搏啦！小弟就介紹大家買幾款索女月曆，有佢哋陪大家度過新一年，一定可以令大家鬥志激昂，熱血沸騰架！
月曆係生活必需品，因為大家都有好多大小事務需要用月曆幫手記住，如常見就梗係記住邊一日有賽馬，以及六合彩金多寶啦！另外，記載事情小至打掃家居，大至結婚擺酒，月曆亦能夠提供到溫馨提示，好多人每朝起身都一定望吓個月曆睇吓今日有咩好做先架！
由於月曆咁重要，所以外國唔少團體為咗籌募經費或善款，都會推出慈善月曆！當中，為吸引大家注意，更加有好多係裸體月曆！不過就唔一定係明星或名模全裸演繹，而係由一班有善心嘅素人為慈善而剝光豬！然而，效果往往更加出色，因為佢哋會因應自己嘅工作及慈善性質，而配合相應環境拍裸體月曆，好似空姐就會脫清光去到機艙扮招呼客人之類，令月曆有肉光之餘仲有實感！以下呢三款亦係香艷火辣嘅2011年最新月曆喇！
Ryanair一向以廉價航空服務而聞名，成間公司有超過八千個職員，至於今次推出嘅慈善月曆，入面所出現嘅佳麗，就係由四百名空姐挑選出嚟！大家都知啦，空姐十個九個都係高質美女，家陣月曆嘅佳麗仲要從中經過精挑細選，絕對係高質中嘅高質！而呢個Ryanair慈善月曆已經係第四年推出，一如以往，月曆中出現嘅空姐都以火辣泳裝上陣，驕人身材表露無遺。所以，每個賣十英鎊，限量一萬個嘅月曆亦應火速售罄，2011月曆將會為佢哋嘅慈善基金帶來十萬英鎊收入！
1 Two 3係澳洲一個飲食集團，經營餐廳、酒吧及咖啡店，而集團為製作呢個月曆，就從旗下嘅食店挑選出26名年齡由二十至四十嘅男女職員，仲要佢哋個個都剝光豬，並且去到食店取景，所以睇落好似裸女侍應同裸女廚師正在工作一樣！雖然，佢哋全裸嘅胴體三點都有嘢遮掩住，但係豐乳盛臀點都遮唔晒，肉光依然盛放空前，令食店內溫度猛升！至於月曆賣出後籌得嘅善款，就會資助癌病、肺病等等嘅病人，真係好有意義呀！
每個人都有惻隱之心，見到有陌生人受傷，點都會覺得傷心，繼而出手相助！有時更加係瞓身相助添！就好似英國紐卡素大學嘅農業系學生咁，知道一位叫做Simon嘅同學，因意外而從六呎高牆墮下而腦部永久損傷，仲昏迷咗五個星期！好彩家陣已經漸漸好轉，搬到復康中心繼續接受治療！而為咗幫呢個不幸嘅同學仔，一班農業系男女同學個個都鼎力相助，仲決定製作一個裸體月曆籌款幫佢添！由於月曆咁有意義，所以令好多家長同當地企業都出手資助印刷費用，真係令人覺得人間有情呀！
撰文：賢