最近內地全力掃黃，各地嘅執法部門，都好似以捉姦在床為己任，專捉一啲「爆房進行中」嘅男女，所以最近發放出嚟嘅掃黃圖片，全部都係一雙一對嘅肉蟲，唔少嫖友連條毛巾都圍唔切，就畀記者影晒相。
利用傳媒作現場報道，喺內地好多案件都有咁做，但近年最吸引觀眾目光嘅，當然係掃黃片段，因為可以一睹城中最高級娛樂場所嘅環境，更可睇睇裏面嘅靚女，加上家陣興玩捉姦在床，於是不時睇到嫖友同妓女，打晒格仔嘅畫面出現，極具震撼性，如果發現現場有玩3P、SM、性玩具等情況，更加會大肆報道。
有老友擔心，萬一失手被擒，會唔會唔畀着衫，就咁赤條條返派出所呢？我哋搵嚟資深北行前輩良哥解釋。佢話：「我以前都畀人捉過幾次，有兩次仲係喺酒店當場斷正添，我記得當時啲執法人員非常客氣，除咗叫我哋慢慢着番衫褲，仲問我使唔使沖個涼先，我有次真係沖埋個涼至跟佢哋返派出所，唔似依家呼奴喝婢咁樣，我聽啲失手被擒嘅朋友講，有啲執法人員真係連佢攞條毛巾圍吓都唔得，認真揸正嚟做。」
點解會咁冇人情味呢？良哥話：「如果上法院，控方就要證明你哋曾經召妓，於是客人同妓女嘅內衣褲，就係重要證物，所以唔會畀客人隨便着番，如果撞啱畀你着番嘅話，咁你就好彩啦，返到去私了就可以，但如果唔畀着番嘅咁就大鑊！」
其實除咗要嚟做證物之外，原來仲有一個好重要嘅原因。良哥話：「就係家陣掃黃，好多時都有當地傳媒隨大隊出發，美其名作現場第一直擊報道，實際作用就係幫手做成績表，而所謂有冇做到功課，關鍵就係畀傳媒影到啲乜嘢，及喺區內造成幾大嘅回響，所以拍攝內容一定要大膽出位。捉姦在床，生擒兩條肉蟲，當然最有視覺效果，於是掃黃時不惜踢房門衝入現場，而第一位衝入去嘅大多數都係隨行記者。」
良哥話：「由於捉姦在床嘅畫面氾濫，於是有地方嚟個赤裸審犯，要犯人光脫脫喺鏡頭前接受盤問，後嚟引起道德討論，至畀疑犯圍番條毛巾，但同樣為咗畫面效果，喺帶疑犯離開時只係圍住條毛巾就算。」所以唔想赤裸上電視，咪上去玩咁多啦！
撰文：小德