從前喺內地夜店工作嘅Dancer，通常都需要「趕場」，意思即係喺A店表演完，就會即刻趕去B店，為咗搵多啲，部分女仔甚至一晚走幾間場，雖然辛苦，但為咗搵食，可謂別無選擇。不過，家吓做Dancer已經唔需要受趕場之苦，事關好多夜店都會安排佢哋做埋營銷，即係佢哋跳舞表演之餘，仲會做埋公關角色，兼任負責Sell客嘅Sales，同時需要陪客飲酒玩樂。
據了解，呢種Dancer加營銷制度，其實唔係一件新鮮事，早年喺部分深圳夜場已經出現過類似情況，負責人喺場中放咗一啲好似燈頭嘅女仔，負責Call客嚟玩、拉客。而收入方面，每個月有固定底薪，再跟公司拆每個捧場客消費嘅比例。當佢哋唔需要表演嘅時候，就會落場陪客人吹水、飲酒、玩骰盅等。
一個人做幾項工作，聽落似乎好辛苦，之不過唔少女仔都話冇所謂，反而覺得好Enjoy，一位喺深圳某大的士高工作嘅Dancer表示，呢個兼任多個範疇嘅工作方式，一來可以為佢帶來更多收入，二來可以乘機學習更多跳舞以外嘅工作技巧，就算唔好彩畀老闆炒魷都唔怕冇出路。
撰文：大軍