最近西安有間商場為咗宣傳，竟以「愛情滋味」為主題，搞咗個「創意接吻大賽」，顧名思義，就係要參賽者喺大庭廣眾底下互相擁吻，而且招式仲要最多、最古怪，就可成為大贏家。有關報道出街後，遭到網民狠評為「道德淪亡」！
點解啲網友咁反感呢？原來係睇唔過眼。話說西安有間商場為咗宣傳，喺五月底搞咗個「創意接吻大賽」，其實接吻大賽一啲都唔出奇，好似過往嘅情人節，都有唔少組織搞過類似活動，但人哋出手闊綽，贏得冠軍嘅獎金加獎品，總值就超過幾千元，可為節日增添色彩。但今次活動竟以888人民幣嘅現金大利是作為優勝者獎品，網友認為出手太低。
但當日竟有十幾對年輕男女爭住上台獻技，有網友話家陣啲年輕人真係十分開放，雖然接吻都唔算係乜嘢一回事，但喺大庭廣眾下，不斷玩花式接吻，加上唔係情人節，都有咁多人參加，除咗話佢哋夠晒開放之外，都唔知有乜嘢好解釋？
另外據當地報道，由於該次活動宣傳不足，其實真正係情侶嘅只得七、八對，另有兩三對係現場臨時拉伕速配而成，有人肯為888蚊就同陌生人接吻，甚至擁抱幾十分鐘，呢個真係唔知乜嘢世界？
由於係標榜創意接吻，所以參賽嘅男女，都要不斷展現唔同嘅接吻花式，期間定有身體親密接觸，如果對手係陌生人，畀佢又攬又抱又錫，個囡囡真係乜都蝕底晒，何況冠軍只得一對，萬一輸咗，斗零都冇得分。但依然都有囡囡與陌生男子搭配參賽，真係令人跌晒眼鏡，於是網友只可以惋惜地慨嘆現今世界正是「道德淪亡」，就係咁嘅意思！
撰文：小德