內地民眾利用網上求助嘅個案與日俱增，利用同情心嘅詐騙行為亦為數不少，例如有賣淫女假扮賣身救家人，藉以博取其他人同情，實際上只係想搵一張長期飯票，擺脫皮肉生涯，若然搵不到，就會利用「清白之軀」去抬高身價，認真離晒大譜！
內地貧富懸殊嘅問題嚴重，當經濟出現困難，難免有少女會想到賣身救父救母。喺內地嘅網站論壇上，不時可以發現呢類可憐人嘅留言，之不過真定假就不得而知。現於廣州居住嘅阿良表示：「早前喺內地某個網站論壇聊天時，無意中見到一個留言，標題上寫着「賣身求助」，於是好奇按入去睇吓，原來呢個留言係由一個叫小芳嘅湖北姑娘發出，佢自稱係一位大學二年級學生，內容大概係講到佢嘅家人身患重病，急需做手術，但由於手術費用高昂，一家實難以支付，所以喺迫不得已之下只好賣身籌錢。」睇完呢個留言之後，阿良留下聯絡方法，好快就得到小芳嘅回覆，對方再三強調自己出身清白，絕對只係為咗幫助家人先咁做。
後來阿良相約小芳出嚟見面，兩人去到一間咖啡屋傾談，本來阿良想了解對方多啲，之不過小芳以趕時間探病為理由，催促佢盡快給予援手。阿良續話：「呢個小芳話希望只跟一個男人，所以希望我用一個月六千蚊嚟包養佢，當我話要考慮嗰陣，佢就提出可以先『幫助』一次，覺得適合先再下決定，但幫一次，就要收取一千蚊！」當時阿良表示身上冇帶咁多錢，小芳聽見即時面有難色，仲強行向佢索取二百蚊車馬費。
事隔多日，阿良又喺論壇上見到一個同樣係「賣身求助」嘅留言，雖然留言者名叫小楠，但聯絡方法跟小芳一樣，令佢懷疑有人存心騙財，於是暗中託朋友試探，果然兩者都係同屬一人。而更驚人嘅發現係，當阿良嘅朋友跟蹤小芳時，發現佢唔係大學生，而係喺一間色情足浴店工作嘅技師。
撰文：娟娟