問：早排喺廣州一間的士高識咗個女仔，樣貌只屬一般，但身材就Fit到漏油，加上豪放又大膽嘅性格，簡直係最佳性伴。雖然呢個妹妹仔嘅床上功夫有番咁上下，之不過天生分泌不足，經常搞到我舉步維艱，於是佢走去買咗支潤滑劑嚟用，樽身上除咗有中文字嘅牌子名之外，就冇其他資料，雖然可解決部位乾涸嘅情況，但卻衍生出另一個問題，就係用後感覺油立立，難以清洗，仲會令皮膚有啲敏感，究竟繼唔繼續用好呢？
答：雖然未能證實你所用嘅潤滑劑係咪有問題，之不過仍建議即時停用，以免令皮膚情況惡化，有需要就去睇醫生。老實講句，唔係話內地牌子有問題，而係信心問題，要知道內地市場不時出現一啲來歷不明嘅性用品，產品上並無列明出產地、安全標籤、成分等資料，相信定係山寨貨。使用後除咗對身體有害，如果潤滑劑本身屬於油性，有機會令安全套變得更易破爛，萬一出事，搞到個套穿咗，到時就真係有排驚。為免夜長夢多，你應該去購買一啲有安全認證嘅產品，想玩得開心又放心，呢啲錢係唔慳得架！
撰文：娟娟