最近兩個電視台都搞乜乜巨星大賽，據講收視唔錯，唔少年輕人都受到感染，發夢都想做歌星。同一時間，亦有老友受感染恨做專業評判，喺佛山就有間夜總會搞咗個活動，可以滿足客人扮專業評判嘅要求。
呢個活動叫做「為你打氣」巨星歌唱大賽，玩法好簡單，分第一階段同第二階段。第一階段比賽，每間房嘅客人同囡囡都可以參加，囡囡會各自演出一首首本名曲，然後就讓在場每位客人點評，客人當然可以扮晒專家，話佢冇感情或者咬字唔清之類。當客人點評完之後，就到下一位囡囡唱歌，餘此類推，如果有四個客人，四個囡囡，客人就可點評四次。
四人演唱完畢，就要由客人嚟評分，而評分嘅方法，就係最少一分，最多十二分，點解十二分呢？原來客人每畀一分，就要買一支啤酒，最高分係十二分，即係要買一打啤酒，現場一打啤酒大約三百幾蚊，客人只要玩得開心，就乜都冇所謂。
四個囡囡都要畀分，條數都咪話唔乸脷，自己嗰個囡囡唔少得畀十二分，其他囡囡每人畀四、五分，每個客人就要買打幾兩打啤酒，呢招都咪話唔高明。
呢條橋仲有下着，就係買啤酒最高嘅十位客人，同埋得分最高嘅十位囡囡，就可以參加總決賽，囡囡會上台演出，而十位特邀客人，就喺台下做現場評判，你都咪話唔威。有啲想出風頭嘅客人，就會晚晚嚟幫襯，希望可以到時上台威吓，而囡囡為爭冠軍，亦會向客人施展美人計，希望每晚都攞高分，爭取出線，正係一家便宜幾家着，所以話呢條橋真係值得學習。
撰文：小德