撰文：小德

分清早洩種類

好多男士身體出現問題，就會同醫生講：「我最近啲性能力似乎唔係咁好，係咪有病呢？」或者：「醫生，我懷疑自己可能腎虧？」講述病情時講得唔湯唔水，唔好話醫生，有時連神仙都難明，咁樣做只會令醫生無所適從，唔能夠正確對症下藥。

就好似早洩患者，就要清楚話畀醫生知道，自己係原發患者還是繼發患者，原發就係自開始性生活就有早洩現象，繼發就係以前冇咁嘅現象，只係最近才發生。咁樣表達，可以令醫生對患者嘅病情有更深嘅了解，另外，所謂早洩，係未進入已經出現，還是進入後才出現，而進入後究竟持續了多少秒就射精，一般醫學上嘅早洩指標，係進入後一分鐘內就射精，咁至被視為早洩。

詳細講述清楚

除了時間方面要講清楚畀醫生聽之外，出現嘅頻率都要講清楚，例如十次有一次，還是十次有五次，定係十次十次都係咁，病人愈講清楚，醫生就可以從中推斷出患者嘅病情，從而做出最適當嘅診斷，另外，早洩與勃起障礙，很多時都會一齊出現。

所以患者向醫生講述病情時，最好就係連勃起時嘅狀態都講述清楚，例如有冇出現勃起障礙？出現嘅比例？同埋勃起時嘅堅挺度等？都對醫生斷診十分有幫助。至於其他問題，例如性生活嘅次數和對手，有否長期患病、長期服藥、曾經大病一場、動過手術等，都要講清楚，至於日常生活習慣，亦要一一告之，醫生擁有充足嘅資料，才可以對症下藥，病人至可以藥到病除。