前兩日老友成哥遇到單麻煩嘢，叫我出嚟睇吓有冇計拆掂佢，事緣成哥喺內地識到條三陪妹，兩人情投意合，於是齊齊同居，大家相安無事，生活咗一年，但最近條女嘅前度男朋友竟然搵上門，話佢當年使咗好多錢，要求條女畀分手費。
成哥聽條女講，由於事前冇跟條友講分手，家陣再同其他男人一齊，於理不合，所以應該賠償畀前男友，仲話賠兩萬蚊畀人，我聽到呢度，馬上叫成哥千祈咪制，叫條女由長安搬嚟深圳住，如果條仔有本事搵到落嚟，咁就證明佢哋兩個係有嘢。
中國咁大，佢哋只係平民百姓，除非佢哋有聯繫，否則邊咁易搵到佢，何況一開口就兩萬似乎食水太深，人哋做咗十幾年夫妻，分手都係收一萬八千啫，有啲幾千蚊就搞掂，我叫佢小心啲，咪輕易上當，其實內地真係興畀分手費，特別係不忠一方，更要畀錢出嚟賠償另一方，呢個係不成文規矩，但如果對方開天殺價或者暴力恐嚇，一於報警處理，千祈咪妥協，有證據就上法院等個官判，先至係最好辦法。
撰文：小德